அம்மா

மூத்த பிள்ள நான் பிறக்க - உன்

உயிரில் பாதி கொடுத்தவளே

பார்க்க வந்த சொந்தத்துக்கு - என்னை

திருஷ்டி பொட்டால் மறைச்சவளே

கருவறை இருளில் கூட - ஒரு

கனவு நானும் கண்டிருந்தேன்

வெளியில் வந்து பார்த்ததுமே - நான்

கண்ட கனவை உன்னில் கண்டேன்

அழுதா பிள்ள பேசுமுண்ணு - தாதி

கிள்ளி விட்டு பார்க்கயில

பிரசவ வலியப் பொறுத்தவளே - நான்

அழுத வலியப் பொறுக்கலயே

தூக்கம் ஒன்றே உலகமுண்ணு - நான்

நாளும் பொழுதும் தூங்கயில

ஓலைப்பாயில் குளிர் ஆகாதாம் - தன்

மடியால் மெத்தை தந்தாயே

காய்ச்சல் தடிமன் எனக்கேது - தாய்

பாசக் காவல் அரணுக்குள்ள

இருந்தும் ஒருமுறை வந்ததற்கு - அதன்

மருந்தாய் உன் துயில் துறந்தாயே

சோறு ஊட்ட நிலவுக்கதை - என்

சோர்வு போக்க சிங்கக் கதை

இத்தனை கதைகள் எனக்கெதற்கு - உன்

தியாகக் கதையைச் சொல் எனக்கு

பள்ளிப் பருவம் நெருங்கயில - உன்

கண்ணில் தெளிவு நான் கண்டேன்

தெளிந்த பார்வைக்கு காரணத்தை - இன்று

பல்கலைக்கழகத்தில் புரிந்து கொண்டேன்

உன் பாசம் என்ற மந்திரத்தை - என்

வரிகளால் சொல்லப் போதாதே

இருந்தும் தாயே பொறுத்தருள்வாய் - என்

மூட நம்பிக்கையை ஏற்றுக்கொள்வாய்