உன்னை நான்

கண்ணிமையால் சிறைப் பிடிப்பேன் - உன்னை

கவிதைகளால் கடத்திச் செல்வேன்

காற்றலையால் வீடமைப்பேன் - அங்கே

கார் முகிலால் போர்வை செய்வேன்

கதிரோனுக்கு அழைப்பு வைப்பேன் - உன்

கண்கள் காண விழா அரங்கு வைப்பேன்

வீசும் உன் விழி வெளிச்சம் கண்டு - அவன்

வியர்வை சிந்தவே கால் நனைப்பேன்

குறுநகையைப் பதிவு செய்வேன் - அதை

குரல் தீண்டாப் பாடல் என்பேன்

கூந்தல் முடி நடனம் காண - சிவனின்

கங்கை நதியைக் காக்க வைப்பேன்

இத்தனையும் வடிவம் ஏற்க - காதல்

அகத்தியனாய்த்  தவமிருப்பேன்

சம்மதத்தை மௌனம் கொன்றால் - கணமே

அதிஷ்ட்டம் மீது போர் தொடுப்பேன்!!!!