அப்பாவின் மிதிவண்டி

நெஞ்செல்லாம் அதுதானே

நெனைப்பெல்லாம் அதுதானே

அஞ்சாறு வயசினிலே - என்

கனவெல்லாம் அதுதானே

கப்பலும் அதுதானே

கார் வண்டியும் அதுதானே

அப்பாவின் மிதிவண்டி - எனக்கு

அரசன் வரும் தேர் தானே

உக்காந்து நானும் வர

அப்பாவும் அத ஓட்டி வர

மரமெல்லாம் ஓடி வரும் - அது

எங்க வண்டியப் பார்க்க வரும்

தெருவெல்லாம் இருக்கும் பள்ளம்

சில நேரம் துள்ள வைக்கும்

தெரு மூல பெல்லுச் சத்தம்

தேவலோகம் கேட்டு நிக்கும்

இறக்கத்தில் போகும் போது

வேகமா காத்தடிக்கும்

ஓட்டியது அப்பாதான் - ஆனா

என் மேனி புல்லரிக்கும்

முள்ளுக்குத்திச் சில நேரம்

காத்தெல்லாம் போயிருக்கும்

மூச்சடங்கிப் போனது போல் - அது

என் கண்ணில் நீரிறைக்கும்

சாமத்துக் கோயிலுக்கு

சடங்குக்கு நாங்க போனா

சாமி கூடத் திரும்பிப் பார்க்கும் - அது

சடங்குக்கு டைனமோ வெளிச்சம் கேக்கும்

காசில்லாக் காலத்திலே

நான் ஏறிப் போன வண்டி

கார் வந்த பின்னும் கூட - எனக்கு

அது தானே ஆச வண்டி