தந்தைக்காக

தவம் ஏதும் செய்ய வில்லை - நான்

தவம் தந்த பிள்ளையில்லை

தாமாக வந்த தவம் - என்

தந்தையாகுமென எண்ணவில்லை

வடம் பிடித்து இழுத்த கைகள் - தெய்வம்

சுமந்த தேரை நகர்த்தி வரும்

தந்தை கரம் பிடித்து நான் நடக்க - அந்த

தெய்வம் சேர்ந்தே கூட வரும்

ஓவியங்கள் நீர் வரைந்தீர் - வர்ணம்

வானவில்லில் வாங்கி வந்தீர்

ஓவியம் போல் எனை வரைய - அன்பின்

காவியமாய் மாறிவிட்டீர்

என் பாதம் வாங்கி நின்றீர் - அதை

உம் நெஞ்சில் நீர் பதித்தீர்

உம் நெஞ்சில் பதித்த பாதம் - அன்பின்

வேர் ஊன்ற வழி வகுத்தீர்

தந்தையாக தாங்கி நின்றீர் - உடனே

தாயன்பும் நீர் கொடுத்தீர்

தந்தை என்பதை நான் மறந்து - பொழுதில்

தோழன் எனவும் நினைக்க வைத்தீர்

தோள் மீது எனை அமர்த்தி - உமக்கே

துலங்காத் தூரம் காட்டுவித்தீர்

அறிவின் வாள் எனக்களித்து - வாழ்வின்

போர் வென்று ஜெயிக்க வைத்தீர்

நீர் காட்டும் பாதையிலே - வாழ்வை

நான் அமைக்க மறுத்து விட்டீர்

நான் வேண்டும் பாதையினை - சுயமே

நான் வரைய வாய்ப்பளித்தீர்

தந்தை என்ற உயிர்ச் சொல்லில் - அடங்கும்

இலக்கணங்கள் தகர்த்து விட்டீர்

தந்தை வேண்டும் உன்போல் என்ற - ஓர்

தலைவிதியை எழுதிவிட்டீர்