அழகால் கொல்லும் அரக்கி

அடி அருவா விழி அழகி - உசிர

அறுக்கிறியே அருவி

இரும்பா இருந்த மனசு - உன்னால்

துரும்பா ஆகுது இழகி

அணையா நிலவப் பழமா - நான்

அடைய நினைக்கும் குருவி

அடடா காதல் இதுவா - என்ன

அழகால் கொல்லும் அரக்கி

என்ன அழகால் கொல்லும் அரக்கி....

மனச மண்ணா நீ பிசஞ்சு

மட் பாண்ட சூளை வைக்கிறியே

மனச எரிக்கத் தீ எதுக்கு - உன்

மௌனக் கதவ அடைக்கிறியே

சிதறும் சிரிப்ப நான் புடிக்க

சிறுவன் போல வீழ்த்துறியே

கதறும் குழந்த கை விரலா - இறுக

இதயம் நசுக்கிறியே

மொறச்சு மொறச்சுப் போனாலும் - நான்

முழைக்கும் விதையா மேலெழுந்தேன்

சிரிச்ச காரணம் தெரியாம - இப்போ

சரிச்ச மரமா சாஞ்சுபுட்டேன்

என்ன அழகால் கொல்லும் அரக்கி....

நீ பச்சப் பாசிப் பதனாக - என்

மொத்த வயசும் வழுக்குதடி

உன் கொச்சத் தமிழக் கேட்டாலும் - கவி

பட்ட மரமாத் துளுக்குதடி

சட்டைப் பையில் பணமாக - உசிர்

எட்டி எட்டிப் பார்க்குதடி

கட்டுக் கட்டா உசிர் வாங்கி - என்ன

காதல்ப் பொருளா வாங்கிக்கடி

சவரம் செய்யும் அலகாக - என்

கவனம் எல்லாம் ஈர்க்கிறியே

கவனம் கொஞ்சம் கலையாதே - என்

கனவு காயம் தாங்காதே

என்ன அழகால் கொல்லும் அரக்கி

ஒரு முற அழகாக் கொல்லு அரக்கி...